السلام عليكم راح اسولفلكم سالفه عشناها گبل

من چنا صغار نكره السبح ليش ؟؟
لانه امهاتنا چانن يعذبنه تعذيب لما يسبحونا والله من تگول لي گوم للحمام يركبني جني من الخوف تگول بزونه محشوره بغرفه تبدأ رحله العذاب من نزع الملابس تنزعني البلوزه عبالك تنتف ريش دجاجه وذاني كل اذن بجبهه طول وقت الحمام يرادلك تبقئ گاعد قرفصاء على التخته زين يايمه والله رجليه توجعني ...
بسرعه تناوشني راشدي طيار وتگول ...
انچب...
بالنسبه للمي لازم يكون تحت درجه الغليان بشويه
يايما لحمي ذاب(انهريت)همينه الطراك الثاني
لما تفرك راسي تكول تفرك بمصباح علاء الدين علمود يطلع الجني
وراسي يطوطح يمين ويسار تگول هندي والمشكله لما ينزل الصابون على وجهك وتريد تشيله تتشوه ملامح وجهك هاي غير حرگه العيون
المشكله انه الصابونه غار(رگي)
طبعا هاي الصابونه اقسى من حجر الحمام الخاص بفرك الرجلين
فقره التلييف
تلزم الليفه وتفركها بالصابونه وهي تباوع عليك تگول گصاب يحد سچاچينه للذبح طبعا ربنا حامينه الا وعلى هل فرك للجسم تسوي شلل كامل
طبعا الحمام بالسرا والصغير گبل الجبير ولما اسمع اخويه الصغير يبچي وهيه تسبحه واني بثاني غرفه اصير ابچي تلقائيا من الخوف
بعد الحمام تباوع بالمرايه والبخار يطلع من جسمك وكانك جدر ضغط مفتوح الاصابع مجعلكه ولون جسمك ابيض واحمر من الفرك
بالنسبه لتلبيس الهدوم راسك اكبر من فتحه البلوز بخمس مرات وتريد يدخل راسك خاوه وتلبس اول بلوزه والثانيه والطركاعه لما تگول ألزم الردن حتى تلبس البلوزه الثانيه ويا ويلك اذا تفلتها مع حمام الغاليه حتى لو انت صومالي تصير ابيض الله يرحم هذيج الايام الحلوه ..

كل ام عايشه الله يطول بعمرها .
وكل ام متوفية الله يرحمها وينور قبرها.


ما راق لي