المنتديات الادبية

**عادل عبود** · 09.10.18 4:52

ادري من الحلاة تشرك لهاة الناس

واليشرك يصيح الماي الحكوني

وانه شلون بيه من الحلاة البيك

ماشركة لهاتي الشركن عيوني

انته من تحجي تره الساني يضيع

مثل ام بالسوك ومضيعه طفل

ظلمه خلو صوبنه بلا كهرباء

ودي خدك النه بلكت تشتعل

تمشي مو عالكاع جنك لو مشيت

الناس كله تصيح وجهك دوره

كلهه تلتم من تجي وجنك ثواب

والمايعرفك راح جاب جدوره

اذا بس مره احبك كلشي ماسويت

واذا مليون احبك يعني مااحبك

يمعود دخفف من جمال البيك

الوادم من جمالك كامت تسبك

بوسه انطيني كتلك ماكفرت شصار

جبت امك عليه وكبت الهوسه

حلكك بي اشكال انطيني خدك عاد

وجنك ماشفتني وماخذ البوسه

لاتخليلي ملح وتكلي نام

هيه ياعين التغمض عالملح

ولاتكلي شبيك شو مامستراح

وانته وسط جلاي زارعلك رمح

مجنون بغرامك واعترف بيك

الكلب اعمه لجن ماعاف دربك

انه القافل عليك وما اخليك

يجي واحد على الحاضر يحبك

اغنيها برساله لجن ماكول

احنه شبينه عمي ما نعجبك

تصح ومضة شعر تفرش دواوين

ويصح ديوان ما يفرش حصيره

وتصح كومة زلم ما تسوه فلسين

ويصح مثلك اخو يسوه العشيره

شيجيب باجر واكعد وياك

واظمنك كلب مابين الظلوع

واذا باجر اجه وماجابك ويه

اكض باجر واشمرنه من الاسبوع

يالجمالك بالمدارس درسو

والصفوف انترست ابحبك ترس

رسبو الطلاب كلهم بالاخير

خلصوها استاذ عيدلنه الدرس

لا تروح الأي عرس خايف عليك

ودير بالك لمن ايعزمونك

الناس عطشانه شهر شربت بديك

خاف شربت ماكو ويشربونك

كلش دخت بيك منين مخلوق

اذا من طين اشكن كلش بهاي

كلها بماي تسبح وتنظف الناس

وانته بنور جسمك يسبح الماي

لا تدنك عالذهب لو شفته طاح

هوه يخضعلك اذا شافك قنوع

وجوه تمثال الذهب لا تستراح

لان بس تطلع شمس لازم يموع

انته ووشاع الشمص فد ساعه صار

ومنكم انتو ثنينكم ناخذ ضوانه

ومن نزلتو اعله البشر صار اشتباه

الشمس عل كاع تمشي وانته مشتول بسمانه

عاتب لو تحس وياي باقي اعتاب

وبيبان العتب وياك مفتوحه

سر واحد بقالي وما كدرت احجيه

وانته تحوم يمه ورايد تبوحه

__________________

يالجمالك بالمدارس درسوه

والصفوف انترست بحبك ترس

ورسبوا الطلاب كلهم بالأخير

خلصوها استاد عيدلنه الدرس

==============

لاتطالبني بأمر بي معجزات

لأن ماعندي گلب يتعذرك

تريد مني اذكرك شي مستحيل

غير كون انساك حته اذكرك

==============

من چفك أغار لچفك ايلوح

أگص ايدك إذا لاحتها إيدك

أكتب ما أريدك تنشف الما

ينشگ دفتري وتبقه أريدك

==============

بگلبي اتسابقوا لعبوا الحلوين

خسرت كلها بالدور البدائي

وانته بلا لعب صاعد على الكاس

بحلاتك ربك مصعدك نهائي

==============

آني ماشايف مثل وجهك جميل

وهيچي مثل عيونك آني ماشفت

من گلتلي اهواك مدري شبية صار

هيچي واگف وحدي وبوحدي طحت

==============

أگص الساني خاطر بعد ماحاچيك

خاطر ينتهي البينك وبيني

لگيت النوب عيني اسولف اوياك

گلي أشلون اگص السان عيني

==============

ياباقة ورد أهديلك انته شلون

الورد منك خجل مايدخل السلة

لأن مثلك ورد منوجد في هالكون

إذا إنته الورد في عالمك كله

==============

من وره الحايط شفت چتفك جميل

گلت أگرب حتى اصدگ اضنوني

ومن درت وجهك علي وتبسميت

شكر من وجهك طفر بعيوني

==============

تعال بكل وكت تلگاني موجود

بس كونك تجي مو ما تجيني

واذا ماجيتني هم تنحسب جاي

لأن موجود انته بوسط عيني

==============

ناذر للوطن عمري وانه الممنون

وابيع الروح بارخص لو نزل سوگة

طابوگة اشتريت وماخذت دبدوب

خفت يوم الوطن يحتاج طابوگة

==============

سكرت وگلت بلكي بسكري أنساك

صبيتك هموم بكاسي وشربتك

شربت الكاس كله وللچعب دگيت

حسبالي نسيتك بالچعب شفتك

==============

تريد الناس اسولف وآنه كلي هموم

خانگني الدمع ماأگدر احچي

إذا حته الدمع من شافني بهالحال

لبس أسود علية وگام يبچي

الموضوع الأصلي : ومضات شعرية عراقية // المصدر : منتديات همسات المطر //الكاتب: عادل عبود