المنتديات الادبية

**الساهر** · 23.05.15 22:39

شكرا عالجرح صحيتني بفركاك

شكرا عالجرح صحيتني بفركاك
جنت أصورك بالدنيا بس انته
فضيت الكلب بس الك مو للغير
ولخاطر رضاك الجرح صاحبته
أمنتك كلب لو جان يم ابليس
يسجد والخشوع يفيض من كصته
ما اكتب شعر بيه الخيال خيال
شما باوع عليه جدامي ساحكته
وﻻ‌ اكتب قصيده الصور بيهه جروح
من اقراهه اموت وانذبح سكته
أسألك من خنت تعرفني كلش زين؟؟
لو بس باﻷ‌سم وتكول فاركته
انه الماضعف كلبي ورجف ممشاي
اجذب الكال كلبي تنسمع دكته
أنه البيدي زرعتك من كبل سنتين
طفل جانت محبتك بيدي كبرته
ضكت عنبك كبل ﻻ‌ تبخس اﻻ‌سعار
ﻻ‌ بل من كبل ﻻ‌ ينضج بوكته
صلفه شفافي ﻻ‌كن مو مثل عيناك
حرام الجان خد شفافي بايسته
شنو نفع الكلب لوما عشك يجويه؟؟
وشنو نفع اليحج وتنرفض حجته؟
وشنو نفع الغني ﻻ‌كن فقير اخﻼ‌ق
يترجه بمماته تنبري ذمته
بحر حبي وركبته وانته مو سفان
متوهم تكول البحر غركته
حبيتك نعم ما اختلف وياك
وأحس حبك ملح بشفافي من ضكته
وأنطيتك حنان الدنيا تحلم بيه
ﻻ‌كن بالمقابل شنهو قدمته؟؟
ياخذني الخيال وبابك اوكف بيه
أشوفه بدون جدمي الصفنه ماخذته
مو دكات ادك عالباب ﻻ‌ والله
لحن داخل حسن تترجم بدكته
لوّن الباب تطلع تبجي الجيران
العرف والماعرف يبجي اعله سالفته
عشت كل العصور بمشيتي وياك
بس عصر الخيانه الماعرف قصته
عصر الجاهليه الجنت اسمع بيه
عشته برشف شفتك والخمر ضكته
هسه شما أشوفك شوكي أحسه يموت
وأحس طعم الخمر ما انتشي بلذته
كهرتك اي نعم بس راح اكلك ليش
مو جاهل واكول بﻼ‌ سبب عفته
شفتك ويه غيري كبالي تتمشون
شلت بيدي القلم وبشعري كفرته
طرق بابك شخص ما جنت تتمناه
ضعت وياه مثل ما حبي ضيعته
وانه شاعر حزن بجّيت حتى الناي
جان اخرس تخاف الناس من صمته
حجيت بأذنه قصتي الي عشتهه وياك
صاح الله واكبر واعتلت ونته
مثل عود البخور بجرحه صار وياي
قوه شعري وﻻ‌كن نايي ضعفته
ماتت ذكرياتك بالخريف الفات
وجذع نخلة محبتك من خنت شلته

الموضوع الأصلي : شكرا عالجرح صحيتني بفركاك // المصدر : منتديات همسات المطر //الكاتب: الساهر