 05.03.16 2:49 | مل مني القلم ومن القلم مليترقم المشاركة : ( 1 ) |
عضو vip
 إحصائيةالعضو |  | | عدد المساهمات : 2123 | | نقاط : 105562 |
|
| موضوع: مل مني القلم ومن القلم مليت مل مني القلم ومن القلم مليت
مل مني القلم ومن القلم مليت عمت عينه قلمنا الما نفع شعره
تعب حتى الشعر ويا العراقيين تعب حرفه تعب عجزه تعب شطره
رسمت احروف اسمك رسم فنان جمعت اربيل والانبار والبصرة
وكلت لازم حروفي توحد الخوان ما معقولة هيج تصير فد مرة
ورديت اوشفت ادموع عالوجنات حروفك ياعراق اليوم مطشرة
كردستان تحجي ابزودها وتكول احنا العاصمة وبغداد متاخرة
كركوك النفط ونريدة كله اليوم مانرضى بعد حصتنا متقدرة
والانبار حصتها العراق اتريد لو ليا الحكم لو ارفع السفرة
والبصرة تريد اليوم فد اقليم وتكول النفط الكم فقط عشره
وشفت للفتنة ناس هواية متسرعين ماهمهم وطن او دين اوعشرة
مذبوحة المحبة اوناس تكره ناس اليحب اليوم جنه قابض بجمرة
بالماي الورد مايرضى من نسقيه من دمنا تريد الوردة والشجرة
رقم جبنا قياسي بالقتل والموت اصبحنا شعب نص اهله متهجرة
غركان النهر بالجثث ياظلام وسفوحه غدت للحال متكدرة
عطشانة الشواطي وما تريد الماي لان لونه غدى مصبوغ ابحمرة
غرك دجله بجثثنا وتشهق الانفاس حزنان النخل ياهو الذي ايصبره
نهرين اصبحت بالجثث غركانات ياهواللي يجرها وكلمن باجره
تدور عالجثث هذي الفضائيات ياهو اللي يصور ياخذ الاجرة
معصوبة العيون امجتفة الايدين وانواع الرصاص براسة وبصدره
لا اهله اجو جفنوه بالاجفان مجهول الهوية اومرمي ابحفرة
اذا امه الحنونة الصامت برمضان ما فطرت بعد للان تنتضره
تنتضره يعود تريد تحجي وياه وتكله المهر بالعيد وتخبره
لان باعت ذهبها بشارع الصياغ حتى تزف ابنها الما فرح عمره
وما نامت بقت سهرانة طول الليل ياليل العراق الما بزغ فجره
وما جاها صبر طلعت تدور اعليه ياطلعة حمامة بعينها العبرة
وما شافت ابنها وجاها ملك الموت مازفت ابنها اوماتت ابحسرة
معناها الفرح صاير مثل انسان بيمينه الورد اوخنجرة اليسرة
معناها عراقك كاتل ومكتول سود كلوبهم وعقول مغترة
وين اللي مضى وشفناه حفنة اسنين سنة وشيعة عشنا الحلوة والمرة
هااليوم الاشوفه بعيني او حزنان سنة وشيعة كلها اليوم مدمرة
ملينة الجذب واليمته واليادوب واقع حال لازم نخضع لامره
ملينه الجذب وليمته واليادوب قصايدنا اجت للناس متاخرة
نعم خوان احنا.. وياك اني بهاي لحد اليوم اللي فجر الحضرة
بعد تفجير سامراء احنا اليوم مثل فلم الرعب ودمايته الحمرة
مو فتنة صحيح الصايرة ابغداد تسونامي الفتن بغداد مدمرة
قتل مو عالهوية هواية متوهمين صارت عالاسم كص راس ويشمره
والكال الجذب هذا الحجي يافلان مو حجة الف انجيب هالمرة
ما يكدر بكر يمشي بعد ويكول اوصل كربلا لو اوصل الثورة
صفر كل النتائج للعراقيين بس بالفتنة جابوا عشرة من عشره
هذا يكول سني ناصبي اغتالوه وذاك يكول شيعي رافضي نكفره
ظلوا بها السوالف بيها ملتهيين واسرائيل شعلت نارها الكبرى
يول وين الشرف كدامكم بغداد شكوا ثوبها واخذوها متاسره
اغتصبوها الكفر ماتسمعوها اتصيح اني ام الشرف واليوم مو عذرى
بعد والله ماينفعنا قيل اوقال لان كلشي انتهى وانكسرت الجرة
مرحوم العراق استشهد امن سنين يا وسفة صفت اشلائه متنثرة
متنثر اللحم او يمة كومة اضباع اكلت من لحومه وعظمه اتكسره
صير وياي بس ها المرة اترجاك عيب امن العراق اليوم نتبره
صعب جثة العراق اتصير هيج اليوم خلينا نجفنه او ندفنه ابكبره
هذا الرادته امريكا او بني صهيون رادت للعراق الويل وتثبره
رادو للعراق وشعبه هيج ايصير رادو فتنة تاكل يابسه او خضره
لعد وين المراجل يا ابن بغداد ياابن الفاو والانبار والبصرة
يا ابن عمارة او ذيقار والحلة ياابن النجف اوكوفته او عقرة
يا ابن تكريت او كركوك والموصل يا ابن الكوت والموصل تره مدمرة
يا ابن اسميجة والشركاط او راوة ياابن الدور واربيضة اوابن سمرة
ياابن السماوة النخل بيها ايكول انا مشتاك لابن الموصل او حمرة
يا ابن المثنى او حيدر الكرار لا تنسى الماثر بيك متاثرة
يا ابن العراق الماسكت عاالضيم لا تظنوه متبسم اذا انيابه متكشرة
اريد اليوم نتوحد على الاعداء نعود اخوة كما كنا نعود اسرة
نخيب ظن بني صهيون والاصفر بني الاحمر والاشقر وابو مرة
باجر ينتخي شعب العراق ايصير اقوى امن الحديد ومنهو اليكسرة
باجر يصحى شعبي ونغدي ايد بايد نتوحد نزف للعالم البشرى
شعب الماعرف يغفى ابد ويهون شعب امجاد او نخوة او شعب ذروة
شعب ال علم الدنيا حروفا اوكال كل الدنيا صارت بيا متحضرة
شعب نصر اوكلكامش شعب سرجون حمورابي اومسلته العالم اتنوره
شعب عمار والمقداد او ياسر شعب حيدر علي الكرار اوصهره
شعب قعقاع او خالد صلاح الدين منهو اللي كدر فد يوم ايقهره
لا بد يطوي ها الصفحات يمحيها سحابة صيف لابد انها منحسرة
يعود الود مضايف اهلي ابميسان باهل تكريت والانبار متعمرة
|
| |  |
