المنتديات الادبية

**قمر بغداد** · 11.04.16 23:18

ما مش ريح
تاخذني من ادي لغير ديره؟؟!
ولا غيمه التشيل سنيني
وتنثها بجزيره؟؟!
ارد اهج بصحره
تستوعب حسرتي
الحسره البگلبي چبيره!!
يدنيا التحلم بوحشه..
ويطير الهجرته الغابه
وطلع مرعوب من عشه..
تعالوا اتمددوا بگلبي!!
ويحسره شبيج؟
فاتحلچ درب طبي!!
لا تبقين مستحيه
وعليه عوينتچ تربي!
تستاحش خطوتي
بجنه اذا تدبي!!
أنه بوجهي ثكالى تنوح
وبگلبي طفل يحبي!!
شكبرها الگاع متلمني!!
وتستغربني الحچايات!!
بس الصفنه تفهمني!!
أنه مرتاح لدموعي
واحس ضحكاتي تلچمني!!
غريبه النسمه البصدري!!
وتضيچ رويحتي من اعضاي
وتمل سنيني من عمري!!'
عليله الفرحه والضحكات
فوگ شفايفي تهذري!!
دنيا غروب..
وكلمن راد لبيته.
عنده صغار تنتظره على العتبه..
عنده حبّيبه عل الشباچ توميله..
وتطش ضحكاتها بگلبه..
وآنه ادري العمر چذبه!!!
وتمنيته بجزيره هناك وبغربه!!
حتى يعوفني البطران
ما يسألني عل الصفنه..
يفرحه الماتت من سنين..
دليني اعلى كبرچ وين مندفنه؟!
دنيا غروب..
وكلمن راد لبيته..
حتى الطير لم ولده وغفه بعشه!!
حتى النسمه رجعت
ل لله تعبت حيل..
طلعت وي ندى الغبشه!!
وآنه ووحشتي وصفناتي
لا شارع وامدد بيه
ولا صح بيت للوحشه!!

الموضوع الأصلي : مامش ريح ادهم عادل // المصدر : منتديات همسات المطر //الكاتب: قمر بغداد