المنتديات الادبية

**احمد العراقي** · 20.03.15 12:46

ضاع وياك تعبي

من ثوب الوفه انشك بالخيانة البيك
وغرورك صار قائد ثورة التفكير
بصريح القول ابد مادوريت أعذار
انتهينه وأكدّت ماخانّي التعبير
اعرفك بير لكن مااطخلك راس
اذا راضع سراب منين ماي ادّير
مامجبور ادنّك بس اصيح بصوت
اذا يرجع صدى معناهه خالي البير
بدون ايعاز عقلي الايد هي تروح
اتكلب بالصور والحيرة بيه اتحير
خذتني الصورة جنت وياك ايد بأيد
ضاجت حلت ايدك حتى بالتصوير
كاتلني الفراش شلون عنده اخلاق
وردت طبعك تبدلة ومثل طبعه تصير
مايجرح الوردة وعنهه يعله هواي
متواضع تره الفراش ناصي يطير
مثل لمة فخاتي عضاي يالطاريك
صكر وشما يمرني اعضاي تتطشر
جرح تلعب بروحي وماهديت بيوم
اضطراب بجسمي عايش تكبر وتصغر
حلم وردي جنيتك كلت راح ارتاح
بس طوّخته حيل وصار موت احمر!
كطن خظّر براسي وفحم شعرك صار
وضحكت الشمس من كتلي شيب اسمر
الفلسفة الهلا والملكه عندك حيل
وانه اعرف بس خواصر مشتهه الخنجر
ضاع وياك تعبي وانت شخصك ضاع
وافضالي مشت مجهولة ماتذكر
لأن اسم السهر مرتبط بس بالليل
الشمس متنام ابد لكنهه ماتسهر!
وتكلي اكلبلي ورقة وهي ورقة موت
اكلبهه وترد وبروحي تتعثر
كلبت اوراق ياما وصخمتهه وشوف
بعد ياصفحة نكلب خلص الدفتر!

الموضوع الأصلي : ضاع وياك تعبي // المصدر : منتديات همسات المطر //الكاتب: احمد العراقي