المنتديات الادبية

**المهندس** · 22.08.19 13:36

شسولفلك تعال وشوفني بعينك
حال الليل حالي بلا گمر
لا توصي اطروش
والناس چذابه
ماعدها صدگ بالمره
چم دوب أسولف وي خيالك
وارسملك ألف صور إبالي
وأعت بروحي للعشره
يلي عشرتك عيب تنباع
چهَ لنگ أترف من أخديد الرضيع
وبيك واهس يرد بيه ارود للعشرين
يا نفحة فجر بطيب متعطره
ألمهن بالمعارك إطيوفك الحلوات
وأطشهن فوگ لچعات الجروح
واگولن أدواي وبيهن سره
يملونات بشمس الغروب إشفافك
ومعطرات بريحة العنبر
ومفرفحات بلايه حمره
من تگعد تريدك الامهات إلهن
مابيك لولة ولا بيك أبد زلة
والشامة شكص رماح
بين أخدوده متحضره
تحط نيشانها بگلبي وتصيح ألآه
وگبل لا توچر لهيب الليل
گلبي بحلاتك اموچره
أصحه ونيني إعليك گعده الديره
لا تنام ولك چذاب حته النوم
بس يريد يبوگگ بصلافة عين
ويذبحني بالحسره
شعدها الشماته تركض إعلينه
منهو الچاب طاريهم
واحنه بعشگنه مانحط
بدروبهم گطره
شط بيهم الغيظ وفرع السانهم
سوالف مابيها ابد معنه
واليحب من صدگ
منهم شيضره
يسوار الذهب هنيالك بمعصمها
تدور على الترف بهداي
ريت أنه حرز ومعلگ
برگبة المهره
أعمي أعيونهم وأحرگ كل سوالفهم
وأسوويهم للخلگ عبره
..

الموضوع الأصلي : الناس چذابه // المصدر : منتديات همسات المطر //الكاتب: المهندس